尋親啓事:探訪由此路進

主頁 / 尋親啓事 / 但願我可以沒成長

ID 1339 但願我可以沒成長

十仔

十仔 01/02/2003 03:39

我的角色是
屋企最細嗰個「孤兒仔」。

我要找的她/他/牠/它是
一位唔會離開我嘅媽媽。

我為什麼要找她/他/牠/它?
其實我唔識用咩電腦,最近人地教嘅,冇計啦,呢排出唔度街,唯有係酒店發藕逗。搵人傾偈係因為哩一刻我仲係戒唔到煙啊,停唔到,就諗啲好冇頭緒嘅嘢,越諗個人就越譖。 有時會諗返起啲舊事,我記得有一次送過一頂帽俾人,我周不時都會送啲嘢俾人,但係嗰次係第一次俾人拒絕。我攞住頂帽手開始震,停唔到,點都停唔到。係嗰刻我發覺我唔係咁俾人需要,其實我都好普通,憑咩覺得我送俾人,人地一定會要嘞?其實係好自戀。 但係點解會咁? 我諗翻起媽媽。我發現其實係佢,係佢令我覺得個世界係圍住我轉。唔知點解我而家好需要呢種幻覺。話俾我知一切無需置疑,我就係我。

她/他/牠/它有什麼特徵?
生成點我唔在意、可以好冇錢、都可以冇點讀過書,但係絕對唔可以忙。我好唔覺眼,可能會耽誤你嘅時間,所以非誠勿擾。不過我已經知實搵唔到,因為佢係裡面已經太清楚,咩樣咩聲做嘅嗰碟菜係咩味我都知。我知,我搵唔到,嗰位識做豆腐火腩飯嘅肥肥女人。不過傾下都好,當係消磨時世。

我曾經在何時何地丟失了她/他/牠/它(假如對方還未出現過,我希望在何時何地遇到她/他/牠/它)?
佢話要一間好大好大嘅屋,點知佢住咗冇兩年就唔住了,實係我買得太遲。有機會嘅話,你再煮餐飯啊。但我無咩送俾你,但憑一首闕歌。

結語/呼籲
六歲,浸親過一次,飲過幾啖水,我以為會死,我以為我嘅肺會捱唔過一分鐘。呢一刻我戒唔到哩啖煙同埋煙霧裡面嘅是是非非,我以為我嘅肺會捱唔過一年。係呢一刻,如果世界唔係圍住我轉,咁請你至少話俾我冇阻住個地球轉,好嗎?

1430

Monica

Best Match

Monica 04/02/2003 10:26

我就是你要找的他/她/牠/它,因爲
豆腐火腩飯喔……其實話易唔易話難唔難。
細嗰陣我鐘意食甜嘢,因為好難得可以甜。大個啲我鐘意食酸嘢,因為甜得濟會厭。再大啲又歡喜食咸嘢,可能係覺得食乜都冇味,冇滋味就想加鹽。加鹽加甜唔過癮喇就開始食辣,食辣最衰係食唔到多,多咗就傷喉嚨,唔多又唔過癮。
有一次去睇醫生,佢叫我要戒口,邊度戒得到啊,非但戒唔到仲食多咗。直至有一日有個人話俾我知,辣其實唔係一種味道,而係一種痛嘅時候。我先知原來我係需要痛。點解會需要痛?唔知,唔曉,但係我一定知我唔鐘意吃苦,因為生活已經係咁,冇呢個必要。咁食咩?淡啲囉,豆腐火腩係可以接受,嗱,我唔識煮,但係可以一齊食,一齊返去嗰啲簡簡單單嘅日子,每日有一啲簡簡單單嘅快樂。可能就就係眼前一碟快樂又短暫嘅餸,好值得回味好值得同明白一碟餸嘅人一齊分享。
或者咁樣快樂就可以延續得耐啲,係嘛?

其他補充(例如:回答你的問題;最想跟你説的話)
好多人曾經都對我講過一啲說話,但係冇幾句係真。但係我知浸親,就黎透唔到氣係咩感受,其實我需要一個人圍住佢轉,如果唔係,我都唔知點算。

我願意話俾你知世界係圍住邊個轉,答案唔會令你失望,我地都唔會失望。我唔會離開。

2165

若寧

若寧 02/06/2021 18:09

是否終於相遇~?

1430

Monica

Monica 31/05/2021 02:24

我只想係度等到佢,如果見面,驚會失望。

2138

HEHE

HEHE 30/05/2021 12:47

真係見到佢之後你打算點?

如要回應或留言,請先登入